炭

尋晚再去土瓜灣的無間道後巷食炭爐邊爐，呢次終於食埋佢的燒烤，一個炭爐有個鍋，一個炭爐有個網，燒田雞、燒大蜆、燒魚扣，仲有燒司庵！今朝起身都覺得自己有炭味~~

不過個度的老闆都幾吋，但係吋得黎係好好笑的，你唔會嬲，甚至會覺得佢地都幾型。話說尋日我一個人早到，七點左右坐低就只係叫左一支青島，然後就等其他人到，等下等下等到八點幾先有第一個人黎，就晌呢個時候老闆娘走埋黎同我講：「你好叫湯底喇喎！你坐左個幾鐘先得一個friend到！係唔係架！」哈，我即時都忍唔住笑！

尋晚個度的啤酒推廣係嘉士伯，通常見到有呢d推廣，只要推廣的小姐唔特別乞人憎，推廣的啤酒亦唔係我真係飲唔到的牌子，我都總會幫襯一支的，尋日都有幫襯到，不過最後因為全部都係邦叫的，所以我地之後飲的無啦啦就變晒嘉士伯。後來推廣小姐行埋黎同我地講話佢要收工喇，請我地叫多支，ok啦，多一支都唔會飲唔到，就要啦，然後佢突然望住樹講，話樹好熟面口喎！嘩！我個心諗你收工先黎出呢d招！？點知跟住樹都話覺得呢位小姐熟面口喎！然後佢開始講喇，問樹係咪表哥..... 然後大家就「哦！」，原來佢地兩個都一齊出現過晌OASIS，而大家都識表哥！

表哥晌啤酒界真係人面超廣，去到邊都有啤酒人識得表哥！

邊個係表哥？
咪係強哥囉~~

點解佢叫表哥？
去OASIS問下啦！

B